Қостанай облысы әкімдігі білім басқармасының "Ұзынкөл ауданы білім бөлімінің Обаған жалпы білім беретін мектебі" КММ
КГУ "Убаганская общеобразовательная школа отдела образования Узункольского района" Управления образования акимата Костанайской области

Бүгін мектебімізде жоспарлы оқу-жаттығу эвакуациясы өтті. Мұндай шаралар төтенше жағдай туындаған кезде оқушылар мен мектеп қызметкерлерінің қалай әрекет ету керектігін үйрету үшін ұйымдастырылады.

Дабыл белгісі берілгеннен кейін барлық сыныптар мұғалімдердің жетекшілігімен мектеп ғимаратынан белгіленген эвакуациялық бағыттар арқылы тез әрі тәртіппен сыртқа шықты. Оқушылар қауіпсіздік ережелерін сақтап, сабырлы түрде қозғалды. Мұғалімдер әр сыныпты бақылап, барлық оқушылардың толық эвакуацияланғанын тексерді.

Жаттығудың басты мақсаты, төтенше жағдай кезінде адамдардың өмірі мен қауіпсіздігін сақтау, сондай-ақ дұрыс әрі жылдам әрекет ету дағдыларын қалыптастыру. Осындай оқу-жаттығулар балаларға қауіпсіздік мәдениетін меңгеруге көмектеседі.

Жалпы эвакуация ұйымдасқан түрде өтті. Оқушылар мен педагогтер қауіпсіздік талаптарын сақтап, өздерінің дайын екенін көрсетті. Мұндай жаттығулар алдағы уақытта да жалғасын табады, өйткені қауіпсіздік, әрқашан ең маңызды мәселе.

Мектебімізде ауыл әкімі Нeржанов Маратпен кездесу өтті. Оған 8–11 сынып оқушылары қатысты.

Кездесу барысында Марат мырза мемлекеттік қызметтің маңызы туралы айтып, бұл саланың ел дамуына қосатын үлесін түсіндірді. Ол өз тәжірибесімен бөлісіп, мемлекеттік қызметкер болу үшін қандай білім мен жауапкершілік қажет екенін нақты мысалдармен жеткізді.

Оқушылар көкейлеріндегі сұрақтарын қойып, еркін пікір алмасты. Әсіресе болашақ мамандық таңдау, елге қызмет ету жолдары туралы әңгіме әсерлі болды.

Осындай кездесулер жас буынның азаматтық көзқарасын қалыптастырып, Отанға деген сүйіспеншілігін арттырады.

Бүгін мектебімізде Конституциялық реформаға арналған түсіндіру кездесуі ұйымдастырылды. Кездесуге мектеп ұжымы толық қатысты.

Жиын барысында Конституцияға енгізілетін жаңа нормалар, олардың мазмұны мен маңызы жан-жақты түсіндірілді. Атап айтқанда, адам құқықтарын қорғау тетіктерінің күшеюі, билік тармақтарының тепе-теңдігі, мемлекеттік тілдің мәртебесі және жалпыхалықтық референдум тәртібі туралы айтылды.

Қатысушылар өз пікірлерін білдіріп, сұрақтарына нақты жауап алды. Мұндай кездесулер құқықтық сауаттылықты арттырып, қоғамдағы өзгерістерді дұрыс түсінуге мүмкіндік береді.

Конституциялық реформа – ел болашағына бағытталған маңызды қадам.

4 ақпанда Zoom платформасында «2026 жылы психологиялық қызметтердің жұмысын нормативтік қамтамасыз ету және кәмелетке толмағандарды психологиялық сүйемелдеу алгоритмдері» тақырыбында облыстық кеңес өтті.

Кеңес барысында психологиялық қызметтің алдағы жылдағы негізгі бағыттары, нормативтік құжаттармен жұмыс және оқушыларға психологиялық қолдау көрсету тетіктері талқыланды.

Аталған онлайн жиынға мектеп әкімшілігі мен педагогикалық ұжым өкілдері қатысып, өзекті мәселелер бойынша пікір алмасты. Кеңес қатысушылары үшін бұл кездесу тәжірибе алмасуға және ортақ міндеттерді нақтылауға мүмкіндік берді.

3 ақпан күні Узынкөл ауданы әкімдігінің шақыруымен 10–11-сынып оқушылары хоккей кортына барып, коньки тепті. Қысқы ауа, мұз үстіндегі қозғалыс, достармен бірге өткізілген уақыт балаларға ерекше көңіл күй сыйлады. Мұндай шаралар оқушылардың белсенді демалуына, салауатты өмір салтын ұстануына және бір-бірімен еркін араласуына жақсы мүмкіндік береді. Қарапайым көрінгенімен, осындай сәттер мектеп өмірін есте қаларлық етеді.

Ұзынкөл ауданы ПБ учаскелік полиция инспекторы, полиция майоры Несин Денис Викторович 2026 жылғы 03 ақпанда «Обаған жалпы білім беретін мектебі» КММ-де 5–11-сынып білім алушылары мен мектеп мұғалімдері арасында «Терроризм актісі туралы жалған хабар бергені үшін жауапкершілік туралы», «Терроризм актісінің туындау қаупі кезінде алғашқы іс-қимылдар» тақырыптарында дәрістер өткізді. Іс-шараға 50 оқушы қатысты.